Paabot na su Bagyo

                Naghahalat-halat na kami sa paghabot ni Ruby pero sana dae na magkusog an paros buda uran tapos sana dae mawara an kuryente. Pahit an pag-iling kong pelikula mantang tigchacharge an laptop ko. Pag mga arog lang talaga kaining panahon nagkakaigwang dahilan para magpurupahingalo, magpundo dawa pagmati ko makahinayangon sa oras. Kadakol akong gustong gibuhon ngoniang kulong ako digdi asin limitado an hiro, su mga  dae ko nagigibo pag normal an panahon.

Pagnormal an panahon, abnormal kita maghiro-hiro.

                Nananali ako sa oras na igwa ako. Gusto kong magkaturog, magbabasa-basa, mag-iling-iling sanang pasali, magkanta, magbayle, magkawat, magtunganga sa lanob gabos na kaito nagigibo ko kang aki pa na warang panghihinayang na ngonian, dipisilon gibuhon.

                Sabay sa pagpangadyi na maumayan na an panahon, an pangadyi man na maumayan naman an paghiling asin sa paglakaw sa buhay na sana bako na ini arog kan nagraragasang bagyo.